Presidenti i ShBA-së, Donald Trump, tha se lufta në Ukrainë ishte një “rrëmujë” dhe jo një situatë e lehtë për t’u zgjidhur, vërejtje që ai i mbajti në fillim të mbledhjes së tij të fundit të kabinetit për vitin 2025. Trump tha se është duke pritur rezultatet e takimit të Witkoff me Putin ndërsa shtoi se ka ndërprerë çdo ndihmë financiare për Kievin.

“Siç e dini, kemi një problem me një luftë që populli ynë po përpiqet ta zgjidhë tani me Rusinë dhe Ukrainën. Ne nuk jemi më të përfshirë në luftë financiarisht. Biden dha treqind e pesëdhjetë miliardë dollarë sikur të ishin karamele. Kjo është një shumë e madhe parash. Dhe shumica e tyre në para të gatshme, shumë prej tyre në pajisje. Unë nuk jap asgjë.

Ne ia shesim pajisjet NATO-s. Kombet evropiane na paguajnë për pajisjet, me një çmim njëqind për qind, dhe pastaj i sjellin ato në Ukrainë ose çfarëdo që bëjnë me to. Por ne po përpiqemi ta zgjidhim këtë. Kam zgjidhur tetë luftëra. Kjo do të ishte e nënta, dhe njerëzit tanë janë në Rusi për të parë nëse mund ta zgjidhim.

Jo një situatë e lehtë, më lejoni t’ju them. Çfarë rrëmuje. Është një luftë që nuk do të kishte ndodhur kurrë nëse do të isha president, as një shans. Dhe nuk ndodhi për katër vjet”, tha Trump.