Përfaqësuesit e Odës së Afarizmit të Kosovës (OAK), kanë deklaruar se e  kanë pranuar me shqetësim vendimin e Ministrisë së Punëve të Brendshme dhe Administratës Publike, për vendosjen e një tarife për dezinfektim të mjeteve në hyrje të Kosovës me ç`rast ka kërkuar largimin e menjëhershëm të saj ose mbulimin e kësaj kostoje nga shteti.

“Bizneset anëtare të sektorit të transportit kanë shprehur shqetësim lidhur me vendimin nga MPBAP, i cili nga data 01.60.2020, obligon këto biznese që të paguajnë tarifa shtesë për kamionët që hyjnë në Kosovë. Sipas këtij vendimi, kërkohet dezinfektimi i të gjitha mjeteve të rënda që hyjnë në pikat kufitare në territorin e Republikës së Kosovës si masë mbrojtëse. Në këtë rast, biznesi i kontraktuar nga Ministria ka paraqitur disa tarifa të larta, duke filluar nga 17 euro deri në 22 euro, varësisht nga pesha e mjetit”, thuhet në reagimin e OEAK.

OAK kërkon që të largohen këto tarifa, sepse konsiderohen shumë të larta për bizneset, e sidomos tani duke pasur parasysh vështirësitë ekonomike që po hasin. “OAK konsideron se tarifën për dezinfektim duhet ta marrë përsipër shteti sepse biznesi në Kosovës edhe kështu është i mbingarkuar me taksa dhe tatime të ndryshme. Gjithashtu, sipas këtij vendimi kërkohet dezifektimi i mjetit në hyrje të Kosovës, ku shumë transportues që qarkullojnë më shumë se një herë brenda ditës në hyrjet e Kosovës do të detyrohen të pagunë të njëjtën tarifë për secilën hyrje-dalje. Kuptojmë që ky vendim është bërë për parandalim të përhapjes së COVID19, por duhet të kemi parasysh që këto tarifa po ju vështirësojnë punën bizneseve të cilat kanë pasur rënie financiare”, thuhet ne fund të Komunikatës. (A. M / Epoka e re)