Ish-presidenti amerikan, Barack Obama, ka kritikuar veprimet e vazhdueshme ushtarake të Izraelit në Gaza, duke thënë se “nuk ka arsye ushtarake që të vazhdohet të goditet ajo që tashmë është rrënojë” dhe duke argumentuar në favor të shtetësisë palestineze.

“Mendoj se është e rëndësishme për ne që ta pranojmë, ne që nuk jemi palë të drejtpërdrejta në dhunë, të themi: tani, fëmijët nuk mund të vdesin nga uria. Tani, nuk ka arsye ushtarake që të vazhdohet të goditet ajo që tashmë është rrënojë”, ka thënë Obama në një aktivitet në Dublin, Irlandë, sipas një transkripti të publikuar nga zyra e tij, shkruan CNN.

Ai ka vazhduar: “Është e papranueshme të injorohet kriza njerëzore që po ndodh brenda Gazës, dhe është e domosdoshme për ne të insistojmë që të dyja palët duhet ta gjejnë një rrugë në të cilën një shtet palestinez dhe autonomia të ekzistojnë krah për krah me një Izrael të sigurt”.

Komentet e rralla publike të ish-presidentit për luftën në Gaza vijnë teksa liderët botërorë janë mbledhur në Nju-Jork për Asamblenë e Përgjithshme të Kombeve të Bashkuara, një mbledhje e trazuar nga konflikti shkatërrues.

Kryeministri izraelit, Benjamin Netanyahu shpërtheu të premten ndaj njohjes së fundit të shtetësisë palestineze nga vendet perëndimore, duke akuzuar liderët botërorë se “janë dorëzuar nën presionin e mediave të njëanshme, elektorateve islamiste radikale dhe turmave antisemitike”.

Obama ka kritikuar liderët politikë për dështimin për t’i zgjidhur armiqësitë dhe ka veçuar Netanyahun, duke iu referuar marrëdhënies së tij të tensionuar me liderin izraelit dhe duke komentuar se “nuk shkonim gjithmonë mirë”.

“Për fat të keq, shpeshherë udhëheqësit, politikanët kanë interes ta ruajnë idenë se është thjesht ne kundër tyre, dhe se është faji i tyre, sepse kjo i ndihmon ata të mbeten në pushtet”.

“Është një lojë cinike. E pashë gjatë gjithë presidencës sime, dhe nuk isha gjithmonë popullor në atë rajon sepse i vija përballë. Mendoj se është e drejtë të thuhet se unë dhe kryeministri i Izraelit, i cili është ende aty, nuk ishim miqtë më të mirë”, ka thënë Obama.

Izraeli ka nisur inkursionin tokësor në qytetin e Gazës më herët këtë muaj, pasi miratoi një plan në gusht për ta marrë nën kontroll dhe pushtuar qytetin e bombarduar rëndë, të cilin e quajti një nga fortesat e fundit të Hamasit.

Kombet e Bashkuara kanë paralajmëruar se planet e Izraelit për ta pushtuar qytetin e Gazës do t’i vinin rreth 1 milion palestinezë që jetojnë aty në rrezik të zhvendosjes së detyruar. Ushtria izraelite i ka thënë CNN-it të martën se 640 mijë njerëz e kanë lënë qytetin që atëherë. Nuk është e mundur të verifikohet ky vlerësim.

Administrata Trump po shtyn gjithashtu për një fund të konfliktit. Këtë javë, të dërguarit amerikanë kanë propozuar një plan paqeje me 21 pika për t’i dhënë fund luftës në Gaza.

Dhe presidenti Trump ka shprehur pakënaqësinë e tij me udhëheqjen e Netanyahut. Duke folur të enjten në Zyrën Ovale, ai ka thënë se nuk do të lejojë që Izraeli ta aneksojë Bregun Perëndimor të pushtuar, duke vendosur një vijë të kuqe të rralla mbi veprimet e Izraelit në territorin palestinez.

“Unë nuk do të lejoj që Izraeli ta aneksojë Bregun Perëndimor. Jo, nuk do ta lejoj. Kjo nuk do të ndodhë”, ka thënë presidenti Trump, duke pranuar se ka folur me Netanyahun më herët gjatë ditës për këtë temë. “Mjaft. Është koha të ndalet tani”.