Presidentja Vjosa Osmani i ka kthyer përgjigje kryesuesit të seancës konstituive të Kuvendit të Kosovës, Avni Dehari, i cili i është drejtuar asaj me kërkesën për “sugjerime” pasi e ka ndërprerë seancën për shkak të mosmiratimit të raportit të Komisionit të përkohshëm për verifikimin e mandateve.

Në këtë letër, Osmani ka thënë se Kushtetuta i detyron të jetësojnë e jo të bllokojnë procese.

“Rrjedhimisht, gjithashtu ju rikujtoj se fryma Kushtetuese, praktika gjyqësore e Gjykatës Kushtetuese dhe Rregulloja e Kuvendit, ju obligon që seancën konstituive ta vazhdoni jo më vonë se brenda 48 orëve nga ndërprerja e saj. Andaj, ju ftoj që në përputhje me autorizimet tuaja si kryesues i seancës konstituive të legjislaturës së nëntë të Kuvendit efektive që nga data 8 prill 2025, ta realizoni seancën konstituive në përputhje me parimet kushtetuese të përmendura më lartë, Rregulloren e Kuvendit dhe legjislacionin në fuqi”, është thënë në letrën e Osmanit, drejtuar Deharit.