Ushtruesja e detyrës së presidentes, Vjosa Osmani, ka deklaruar se Ushtria e Kosovës është shndërruar në një ushtri modele falë sakrificës të djemve dhe vajzave të vendit.

Në Ditën e Forcave të Sigurisë së Kosovës, Osmani ka thënë FSK-ja është sinonim i shtetësisë.

“Ne si vend asnjëherë s’kemi pasur synime pushtuese, por vetëm mbrojtjen e atdheut. Ambicie mbesin integrimi në NATO dhe BE. Forca jonë është sinonim i shtetësisë”, ka deklaruar Osmani përmes një video-mesazhi.

Ndër të tjera, ajo  ka deklaruar se pjesëtarët e kësaj force janë të përgatitur sipas standardeve më të larta dhe janë të gatshëm të marrin pjesë në operacione të paqes. “Ushtria e Kosovës është ndërtuar në themelet e sakrificës sublime. Është e zonja t’i dal zot atdheut në çdo kohë. Sot ushtria e Kosovës është simbol i shërbimit. Qëllimi kryesor i jonë gjithmonë ka qenë mbrojtja e atdheut tonë. Të stërvitur me standardet më të larta të NATO-s. Oficerët dhe nënoficerët po shkollohen jashtë vendit. Në këtë ditë të veçantë nuk të mund të mos shprehim falënderim për aleatët tanë”, ka deklaruar Osmani.