OVL-UÇK teksa e quan fitore historike shpalljen e pafajësisë së Ramush Haradinajt përballë akuzave të Serbisë, thonë se ashtu siç u provua e kjo e drejtë, njësojë do të jetë edhe për ish-krerët e UÇK-së dhe të tjerëve që po mbahen në Hagë.

Ata thonë se vendimi para 13 vjetëve ndaj Haradinajt nuk ishte vetëm për një komandant, por një drejtësi për të gjithë luftën e UÇK-së por edhe një dëshmi se kur ndodhë përballja me gjykime politike e vërteta e luftës del fituese.

“Para 13 viteve, Ushtria Çlirimtare e Kosovës arriti një fitore historike përballë Serbisë dhe akuzave të saj të pabaza. Në Hagë u vulos e vërteta që ne e kemi ditur gjithmonë, lufta jonë ka qenë e drejtë, çlirimtare dhe e pastër. Vendimi i pafajësisë për Ramush Haradinajn nuk ishte vetëm një drejtësi për një komandant, por një drejtësi për gjithë luftën e UÇK-së. Ishte dëshmi se edhe kur përballemi me gjykime politike, e vërteta e luftës sonë del fituese. Sot, si atëherë, OVL UÇK qëndron me të njëjtin besim të palëkundur, derisa drejtësia të konfirmojë pafajësinë e Hashim Thaçit, Kadri Veselit, Rexhep Selimit, Jakup Krasniqit, Salih Mustafës, Pjetër Shalës, Fadil Fazliut, Isni Kilajt dhe Bashkim Smakajt. Ashtu siç u provua e drejta për komandantët e tjerë, edhe për ta do të vijë dita e bardhë, sepse lufta e UÇK-së nuk është njollosur kurrë, as në fushëbetejë, as në gjykatë”, thuhet në deklaratën e organizatave të dala nga lufta e Ushtrisë Çlirimtare të Kosovës.