Papa Françesku ka thënë se ishte i pikëlluar që Kisha Katolike në Francë nuk ishte në gjendje të mbronte fëmijët nga abuzimi seksual nga duart e klerit.

Vërejtjet e tij kanë ardhur një ditë pasi një komision francez ka publikuar ​​një raport shterues që ka zbuluar 70 vjet abuzim seksual të fëmijëve në Kishën Katolike të vendit. Ai ka vlerësuar se numri i viktimave të abuzuar nga klerikët dhe njerëzit e lidhur me kishën ishte rreth 330 mijë.

“Dëshiroj t’u shpreh viktimave trishtimin dhe dhimbjen time për traumën që kanë pësuar. Dhe gjithashtu turpi im, turpi ynë, për paaftësinë e Kishës për një kohë të gjatë për t’i vënë ata në qendër të shqetësimeve të saj”, ka thënë Papa në auditorin e tij të përgjithshëm javor.

Papa ka ftuar katolikët në Francë që të marrin përgjegjësitë e tyre për të siguruar që kisha është një shtëpi e sigurt për të gjithë.

Më tutje, Papa i ka bërë thirrje klerit të vazhdojë punën për të siguruar që situata të tilla të mos përsëriten, duke ofruar mbështetjen e tij për priftërinjtë francezë që të përballen me këtë gjyq të vështirë, por të shëndetshëm.

Raporti prej 2 500 faqesh është përgatitur nga një komision i pavarur dhe është botuar të martën, shkruan “DW”.

Raporti në fjalë ka hedhur në dritë mbi mijëra raste të abuzimit seksual të fëmijëve gjatë 70 viteve të fundit që përfshinin 3 000 abuzues dhe qindra mijëra viktima. Rreth 216 000 ishin viktima të klerit francez.

Jean-Marc Sauve, presidenti i komisionit që ka publikuar ​​raportin, ka thënë në një konferencë për media të martën se qëndrimi i kishës ndaj viktimave të saj ishte “indiferencë e thellë mizore”.