Platforma “Meteo Kosova” ka paralajmëruar se një front i fuqishëm ka filluar të prekë territorin e Kosovës në skajin verior.

Në njoftim bëhet e ditur se ky front po karakterizohet me rrebeshe lokale shiu, shkarkesa rrufesh dhe erëra të forta.

“Ndërsa fronti i ftohtë përparon, reshjet pritet të humbasin intensitetin para se të arrijnë jugun e vendit. Megjithatë, stuhia e erës do të vazhdojë të jetë e pranishme, me erëra që mund të arrijnë deri në 100 km/h, duke sjellë rrezik për dëme lokale”, thuhet në njoftim.

Sipas njoftimit, erërat më të përqendruara dhe më të forta priten të zhvillohen kryesisht në Rrafshin e Kosovës, ku thuhet se mund të shkaktojnë dëme serioze, si rrëzime pemësh dhe degësh, dëmtime në çati dhe dritaresh, ndërprerje të energjisë elektrike, si dhe vështirësi në qarkullim dhe rrezik për këmbësorët.