Gjermania ka miratuar buxhetin për vitin e ardhshëm. Në të parashikohen më pak fonde për ndihmat për zhvillimin. Projektbuxheti është miratuar me votat e koalicionit qeverisës, konservatorëve CDU/CSU dhe social-demokratëve.

Në buxhetin bazë parashikohen shpenzime prej 524.5 miliardë eurosh. Këtyre u shtohen shpenzimet për fondet speciale për infrastrukturën dhe neutralitetin klimatik, si dhe për Forcat e Armatosura Gjermane, të cilat do të financohen nga marrja e kredive.

Në këtë mënyrë borxhi i ri i Gjermanisë do të arrijë vitin e ardhshëm në më shumë se 180 miliardë euro. Ky është borxhi i dytë më i lartë në historinë e Republikës Federale të Gjermanisë.

Buxheti është miratuar me votat e partive të koalicionit qeverisës, CDU/CSU dhe SPD, kurse partitë opozitare votuan kundër.

Ministri federal i Financave, Lars Klingbeil, (SPD) ka thënë se “ky buxhet parashikon edhe rekord investimesh”.

Buxheti më i lartë për punën dhe çështjet sociale

Pjesa më e madhe e buxhetit, rreth 197 miliardë euro, do të shkojë në sektorin e punës dhe të çështjeve sociale, sidomos për pensionet.

Në vendin e dytë për sa i përket buxhetit renditet Ministria e Mbrojtjes, e cila do të marrë rreth 108 miliardë euro. Ky është buxheti më i lartë i Gjermanisë për mbrojtjen që nga koha e luftës së ftohtë. Një pjesë e madhe e parave do të shkojë për pajisje dhe municione ushtarake.

Buxheti për Ministrinë e Bashkëpunimit për Zhvillimin (BMZ) do të reduktohet në 10.06 miliardë euro, kjo është shuma më e vogël në buxhetin e përgjithshëm të Gjermanisë në 15 vitet e fundit.

Ukrainës do t’i jepen në vitin 2026 ndihma në vlerë prej 11.5 miliardë euro.

Buxheti me investimet më të larta do të jetë ai i Ministrisë së Transportit. Për investime të mëdha në rrugë, ura dhe hekurudha do të jepen 14 miliardë euro nga buxheti i rregullt si dhe 21 miliardë euro nga fondi special për infrastrukturën. /DW