Në kuadër të investimeve kapitale të Ministrisë së Inovacionit dhe Ndërmarrësisë (MIN), për vitin 2019, kjo ministri në bashkëpunim me Universitetin “Haxhi Zeka” në Pejë do të themelojë Qendrën e Inovacionit dhe Ndërmarrësisë në këtë qytet, saktësisht në hapësirën e këtij universiteti.

Ministri i Inovacionit dhe Ndërmarrësisë, Besim Beqaj, për të lansuar këtë projekt të rëndësishëm ka vizituar sot Universitetin Publik të Pejës “Haxhi Zeka”, në hapësirat e të cilit do të jetë Qendra e Inovacionit dhe Ndërmarrësisë.

Gjatë kësaj vizite, ministri Beqaj ka takuar rektorin prof. dr. Fadil Millaku, dekanin Halit Shabani dhe sekretarin Astrit Adema.

Së bashku kanë vizituar ambientet e dedikuara nga Universiteti për këtë Qendër.

Ministri Beqaj ka folur për rëndësinë e Qendrës edhe para studentëve të shumtë të Universitetit të Pejës.

“Është kënaqësi e veçantë të shoh entuziazmin e madh të studentëve nga Peja me rrethinë, që ishin në numër kaq të madh, për të dëgjuar dhe për të bashkëbiseduar për idenë e kësaj Qendre”, ka thënë ministri Beqaj.

Ai ka shtuar se ky është një lajm i mirë për Pejën dhe themelimi i Qendrës ka për qëllim të lidhë shkencën me biznesin.

Beqaj ka theksuar rëndësinë e veçantë dhe potencialet e mëdha që ka ky rajon për zhvillimin ekonomik të Republikës së Kosovës.

Ministri Beqaj, u bëri thirrje të rinjve të kësaj ane që idetë dhe njohuritë e tyre t’i zhvillojnë përmes inovacionit dhe ndërmarrësisë, në mënyrë që e ardhmja e tyre dhe e vendit të jetë e sigurt dhe e suksesshme.

/Epoka e re/