Përhapja e shpejtë e Ebolës në Republikën Demokratike të Kongos ka krijuar një situatë “thellësisht alarmante”, ka paralajmëruar organizata mjekësore bamirëse Médecins Sans Frontières (MSF), shkruan BBC.

Duke folur dy javë pas shpalljes së shpërthimit të epidemisë, zëvendësdrejtori i MSF-së, Dr. Alan Gonzales, tha se kurrë më parë nuk ishin regjistruar “kaq shumë raste” në një kohë kaq të shkurtër.

Komentet e tij erdhën ndërsa kreu i Organizatës Botërore të Shëndetësisë (OBSH), Dr. Tedros Adhanom Ghebreyesus, vizitoi provincën lindore kongoleze Ituri — zona më e goditur — për të mbikëqyrur përpjekjet për frenimin e virusit.

Tani në RD të Kongos ka më shumë se 1,000 raste të dyshuara me Ebola dhe të paktën 246 viktima. Uganda fqinje ka raportuar nëntë raste të konfirmuara dhe një vdekje.