Franca mund të hakmerret duke dëbuar diplomatë izraelitë nëse Izraeli i zbaton kërcënimet për të mbyllur konsullatën e përgjithshme franceze në Jerusalem.

Georges Malbrunot, një korrespondent i të përditshmes franceze Le Figaro, shkroi se Parisi po përgatit kundërmasa të mundshme pasi zyrtarët izraelitë paralajmëruan se mund ta mbyllin misionin në shenjë proteste ndaj planit të Francës për të njohur një shtet palestinez në seancën e ardhshme të Asamblesë së Përgjithshme të OKB-së.

Sipas Malbrunot, hakmarrja mund të përfshijë edhe uljen e numrit të operativëve të Mossadit që punojnë në Francë, megjithëse ai vuri në dukje se siguria e ambasadës izraelite në Paris nuk do preket. Konsullata, e cila ka vepruar që nga viti 1843, merret me shërbime për palestinezët dhe rreth 25,000 qytetarë francezë që jetojnë në Jerusalemin perëndimor, shkruan Ynet.

Mbyllja e konsullatës do shënonte një përshkallëzim të rëndësishëm në mosmarrëveshjen e Izraelit me Francën. Malbrunot shkroi se edhe marrja në konsideratë e kufizimeve në stacionin e Mossadit në Paris do ishte e pashembullt, duke pasur parasysh bashkëpunimin e gjatë të agjencisë me shërbimin e inteligjencës DGSE të Francës.

Sipas raporteve të huaja, Mossadi ka furnizuar autoritetet franceze me inteligjencë që ndihmoi në prishjen e disa komploteve iraniane në tokën franceze, përfshirë një plan të vitit 2018 për të sulmuar një tubim të opozitës iraniane pranë Parisit.

Presidenti francez Macron njoftoi në fund të korrikut se synon të njohë një shtet palestinez gjatë takimit të OKB-së këtë muaj, edhe nëse Izraeli dhe Hamasi arrijnë një armëpushim para kësaj kohe. Kryeministri Benjamin Netanyahu e dënoi këtë veprim si “një çmim vlerësimi për terrorin”.

Që atëherë, Francës i janë bashkuar disa vende të tjera perëndimore duke sinjalizuar se edhe ato do të mbështesin njohjen e Palestinës në OKB.