Kompania farmaceutike Pfizer ka bërë me dije se pilula eksperimentale që ka zhvilluar kundër Covid-19, duket se është efektive ndaj variantit të ri, Omicron.

Kompania ka theksuar se rezultatet e plota të studimit të pilulës kanë dhënë rezultatet e para premtuese kundër koronavirusit. Kompania tha se sipas studimit, ku kanë marrë pjesë 2 250 persona, pilula ka zvogëluar edhe hospitalizimet dhe vdekjet për rreth 89 për qind në mesin e personave me rrezik të lartë të popullsisë së rritur, pasi ata kishin marrë pilulën pak kohë pasi kishin pasur simptomat e para të sëmundjes Covid-19.

Ndërsa testet e ndara laboratorike kanë treguar se pilula ruan fuqinë e saj ndaj variantit Omicron, tha kompania. Pfizer ka testuar ilaçin antiviral duke përdorur proteina kyçe që Omicroni përdor për t’u riprodhuar.

Në Shtetet e Bashkuara, Administrata për Ushqim dhe Ilaçe pritet që së shpejti të marrë vendim për autorizim ose jo të përdorimit të pilulës së prodhuar nga Pfizer, apo të asaj të prodhuar nga Merck.

Nëse njëra nga këto dy pilula marrin miratimin, atëherë amerikanët e infektuar me koronavirus, do të mund ta blejnë atë në farmaci dhe të mjekohen në shtëpi.

Muajin e kaluar, kompania Merck ka theksuar se pilula që ka zhvilluar, zvogëlonte numrin e hospitalizimeve dhe vdekjeve deri në 30 për qind te personat në moshë madhore, që bëjnë pjesë në kategorinë me rrezik të lartë.

Të dy kompanitë fillimisht kishin bërë studime të pilulave të tyre të personat në moshë madhore, por që ishin të pavaksinuar, pasi kjo kategori konsiderohet se është në rrezik më të lartë nga Covid-19.

Ndërsa studimi i pilulës së Pfizerit te të rriturit që nuk janë në rrezik të lartë – përfshirë edhe personat e vaksinuar, ka deklaruar se pilula ka dështuar të arrinte qëllimin kryesor të studimit: të krijonte lehtësim nga Covid-19 pas katër ditësh trajtimi me pilulën.

Po ashtu, te personat me rrezik më të ulët, pilula ka zvogëluar mundësinë e hospitalizimeve për 70 për qind.

Pfizer ka thënë se më pak se 1 për qind e pacientëve që kanë marrë pilulën janë hospitalizuar krahasuar me 2.4 për qind e pacientëve që u është dhënë një substancë pa efekt terapeutik.