Australasi Oscar Piastri ka fituar Çmimin e Madh të Holandës në Formula 1, duke përfituar nga tërheqja e shokut të skuadrës dhe rivalit kryesor, Lando Norris.

Me këtë sukses, Piastri ka zgjeruar epërsinë në renditjen e përgjithshme në 35 pikë. Me nëntë gara të mbetura, piloti i McLarenit grumbulloi plot 35 pikë, ndërsa Norris, që u detyrua të tërhiqej, do të ketë mundësinë të reagojë javën e ardhshme në pistën legjendare të Monzës për Çmimin e Madh të Italisë. Gara nisi me tension: Verstappen e kaloi Norrisin me një manovër të rrezikshme që gati e nxori jashtë pistës, por në xhiron e nëntë Norris riktheu vendin e dytë.

Shiu i lehtë shtoi dramë në pistë, ndërsa në xhiron e 23-të Hamilton u përplas me murin në momentin kur po synonte të hynte në bokse, duke shkaktuar daljen e makinës së sigurisë dhe zhdukjen e avantazhit të Piastrit. Më vonë, Leclerc kaloi Russell për të marrë vendin e pestë, por në xhiron e 52-të pësoi të njëjtin fat si Hamilton, duke dalë nga pista dhe përfunduar garën. Edhe Ferrari tjetër nuk e përfundoi garën. Në xhiron e 65-të, Norris u detyrua të tërhiqej për shkak të një defekti në motor, ndërsa makina e sigurisë u rikthye në pistë. Nuk pati më ndryshime në renditje, dhe Piastri e mbylli garën i pari, përpara Verstappen dhe Hadjar – i cili përjetoi podiumin e tij të parë në karrierë. Pas kësaj gare, Piastri kryeson me 310 pikë, i ndjekur nga Norris me 275. Verstappen është i treti me 205 pikë, më pas Russell me 189, Leclerc me 151 dhe Hamilton me 109 pikë.