Skena muzikore shqiptare ka marrë sot një lajm të hidhur dhe të papritur. Shemsi Krasniqi, i njohur gjerësisht për publikun si “Shemi”, vokalisti karizmatik dhe lideri i grupit legjendar “Ilirët”, është gjetur i vdekur.

Lajmin për vdekjen e tij e ka konfirmuar Policia e Kosovës për gazetën Nacionale. Sipas njoftimit zyrtar, këngëtari është gjetur pa shenja jete pasditen e së hënës në një banesë në rrugën “UÇK” në Prishtinë.

“Sot rreth orës 15:00 kemi pranuar informatën për një person pa shenja jete në një banesë në rrugën UÇK në Prishtinë.”

Autoritetet kanë bërë të ditur se, menjëherë pas pranimit të informatës, njësitë policore kanë dalë në vendin e ngjarjes, ku ekipi mjekësor ka konstatuar vdekjen.

“Me të marrë informatën policia ka dalë në vendin e ngjarjes, ku vdekjen e viktimës (mashkull) e ka konstatuar ekipi mjekësor në vendin e ngjarjes. Në koordinim me prokurorin e shtetit po ndërmerren veprimet e nevojshme policore.”

Një jetë kushtuar muzikës dhe rokut shqiptar

Shemi ishte një nga figurat më emblematike të “Ilirëve”, grupit të formuar në vitin e largët 1981, i cili la gjurmë të pashlyeshme në historinë e muzikës sonë. Që në hapat e parë me këngën “Merita”, zëri i tij i veçantë fitoi zemrat e publikut.

Me të në mikrofon, “Ilirët” u shndërruan në një prej emrave më aktivë dhe më të dëgjuar të muzikës vendore gjatë viteve ’80 dhe ’90, duke krijuar një repertor që vazhdon të mbetet pjesë e kujtesës muzikore të publikut.

Këngët e tyre u kthyen në hite të pavdekshme që këndohen edhe sot nga breza të ndryshëm. Ndër to spikasin himnet si “Xhamadani vija-vija”, balada e fuqishme “Trupi pa shpirt”, dhe energjikja “Rini thuaja këngës”.

Edhe pas dekadash në skenë, Shemi dhe grupi nuk u ndalën. Në vitin 2012, ata rikthyen vëmendjen e publikut me albumin “Moj Kosovë”, ndërsa në vitin 2014, kënga ikonike “Rini Thuaja Këngës” u ri-jetësua përmes një videoklipi të ri, duke u prezantuar edhe në festivalin “Netët e Klipit Shqiptar 13”.