Policia spanjolle ka kryer sekuestrimin më të madh të kokainës në det, pasi gjeti gati 10 ton drogë të fshehur midis një ngarkese me kripë, në një anije tregtare pranë Ishujve Kanarie.

Detektivët dhe prokurorët e antidrogës që hetojnë një grup kriminal shumëkombësh i cili dyshohet se po eksportonte “sasi të mëdha” kokaine nga Amerika e Jugut në Evropë kanë identifikuar një anije të dyshuar që ishte nisur nga Brazili, tha Policia Nacional në një deklaratë të hënën.

Javën e kaluar, oficerë nga grupi special i operacioneve elitare të forcës hipën në anije ndërsa ajo ndodhej 535 km larg Ishujve Kanarie dhe sekuestruan pothuajse 300 pako kokaine që ishin “varrosur” në një ngarkesë kripe.

Trembëdhjetë persona u arrestuan dhe anija, së cilës i kishte mbaruar karburanti, u tërhoq në portin e Santa Cruz de Tenerife. Pamjet video të operacionit tregojnë oficerët duke përdorur lopata për të nxjerrë pakot e mbështjella nga një sasi e madhe kripe në hambar.

Operacioni, i quajtur “Batica e Bardhë”, u krye në bashkëpunim me policinë federale braziliane, Administratën Amerikane Kundër Drogës, Agjencinë Kombëtare të Krimit në Mbretërinë e Bashkuar, së bashku me autoritetet franceze dhe portugeze.

Në deklaratën e policisë thuhej: “Falë kësaj përpjekjeje të përbashkët, oficerët e Policisë Kombëtare gjetën 9,994 kg kokainë të paketuar në 294 pako që ishin fshehur midis tonelatës së kripës që po transportonte anija, si dhe një armë zjarri që banda po përdorte për të mbrojtur ngarkesën.”

Rekordi i mëparshëm për sasinë më të madhe të kokainës së sekuestruar nga forcat e rendit në det ishte 7.5 ton i gjetur në një anije peshkimi me rrjetë në korrik të vitit 1999.

Në vitin 2024, policia dhe oficerët doganorë spanjollë kapën ngarkesën më të madhe të njohur të kokainës që kishte arritur në vend , duke sekuestruar më shumë se 13 ton drogë, e cila ishte fshehur në një ngarkesë me banane të dërguara me kontejner nga Ekuadori.

Autoritetet spanjolle sekuestruan gjithsej 123 ton kokainë në vitin 2024, nga 118 ton në vitin 2023 dhe 58 ton në vitin 2022.