Në shtëpinë e Milanit, pista që çon te Ardon Jashari mbetet aktive, por drejtuesit e klubit kanë përcaktuar qartë kufijtë financiarë të operacionit. Në një deklaratë gjatë Asamblesë së Serie A, presidenti i klubit, Paolo Scaroni, theksoi: “Nuk duam të ofrojmë shumë. Ai dëshiron të vijë me çdo kusht”.

Fjalë që lënë pak vend për interpretime dhe konfirmojnë qasjen e kuqezinjve për të mbyllur marrëveshjen me kushtet e tyre. Milan e konsideron ofertën aktuale si të arsyeshme dhe të mjaftueshme, dhe nuk ka ndërmend të bëjë një rritje të mëtejshme të saj. Këto deklarata përforcojnë ato që më herët ishin bërë nga Igli Tare, i cili kishte theksuar se Milani ka vënë në tryezë një propozim të rëndësishëm dhe se klubi është i bindur që ka vepruar drejt.

Në këtë mënyrë, presioni kalon te Club Brugge, që tani duhet të vendosë nëse do ta pranojë ofertën e Milanit apo do të rrezikojë të humbasë një lojtar që, sipas vetë presidentit të Milanit, dëshiron të transferohet në Milano me çdo kusht.