Presidenti iranian, Masoud Pezeshkian ka telefonuar Emirin e Katarit dhe i ka shprehur keqardhje për sulmin ndaj një baze ushtarake amerikane në Katar, ka thënë kryeministri i Katarit, Mohammed bin Abdulrahman Al Thani.

Emiri i tha presidentit iranian të martën se Katari është një fqinj miqësor dhe nuk priste një veprim që shkelte sovranitetin e vendit, tha Al Thani, sipas AP.

“Ne e mirëpresim njoftimin (e armëpushimit) pavarësisht shkeljeve që pamë sot. Shpresojmë që armëpushimi të respektohet dhe u bëjmë thirrje palëve që t’i përmbahen armëpushimit të arritur”, tha ai.

Telefonata vjen pasi Katari thirri ambasadorin e tij në Iran të martën pas sulmit me raketa në bazën amerikane në tokën e tij.