Skuadra e promovuar në Superligë, Prishtina e Re të enjten e prezantoi mesfushorin defensivë nga Nigeria, Amos Dadet, kurse të premten kjo skuadër goditi duke transferuar edhe dy futbollistë të tjerë.

Bëhet fjalë për Adrijan Rudoviç dhe Elvis Prençi. Mbrojtësi Rudoviç është 30-vjeçar nga Ulqini dhe ka një eksperiencë të madhe ndërkombëtare. “KF Prishtina e Re forcon repartin mbrojtës me Adrijan Rudoviç, mbrojtësin 30-vjeçar nga Ulqini. Adrijani i bashkohet klubit pas një eksperience ndërkombëtare në Superligën e Malajzisë me Kuala Lumpur, ndërsa më parë ka qenë pjesë e disa prej klubeve nga liga elitare malazeze. Me përvojën dhe qetësinë e tij në prapavijë, ai pritet të jetë një shtyllë e rëndësishme në edicionin e parë në Superligën e Kosovës”, thuhet në njoftimin e skuadrës pishtinase.

Edhe futbollisti tjetër, Elvis Prençi luan në pozitën e mbrojtësit. Ky i fundit sezonin e kaluar ishte pjesë e Skënderbeut në Shqipëri. “KF Prishtina e Re ka kënaqësinë të prezantojë afrimin e radhës në mbrojtje, Elvis Prençin, qendërmbrojtës me përvojë të pasur dhe karrierë të konsoliduar në futbollin shqiptar. Elvisi së fundmi ishte pjesë e Skënderbeut ku zhvilloi 32 paraqitje në Abissnet Superiore dhe Kupën e Shqipërisë. Me përvojën dhe cilësitë e tij në qendër të mbrojtjes, ai pritet të sjellë siguri, lidership dhe karakter në vijën e fundit të skuadrës”, ka njoftuar Prishtina e Re. Në karrierën e tij, Prençi ishte: 2 herë fitues i Kupës së Kosovës, 1 herë fitues i Superkupës së Kosovës, 1 herë kampion i Kategorisë së Parë në Shqipëri.

/Veton ZYMBERI/