Prokurori i posaçëm, Jack Smith, të hënën i kërkoi Gjykatës Supreme të vendosë nëse Donald Trump ka ndonjë imunitet nga ndjekja penale për krimet e supozuara që ai ka kryer gjatë kohës që ishte në detyrë – hera e parë që Supremja do të peshojë mbi ndjekjen historike të ish-presidentit.

Kërkesa e jashtëzakonshme është një përpjekje e Smith për të mbajtur në rrugën e duhur gjyqin për përmbysjen e zgjedhjeve – të planifikuar aktualisht për në fillim të marsit. Smith po i kërkon Gjykatës Supreme të ndërmarrë hapin e rrallë të anashkalimit të një gjykate federale të apelit dhe të vendosë shpejt një çështje themelore të rastit kundër Trump.

Ekipi i Smith i ka kërkuar gjykatës të rishikojë vendimin e gjykatëses së qarkut, Tanya Chutkan, se si ish-president, Trump nuk është i imunizuar nga rasti i ndjekjes penale të përmbysjes së zgjedhjeve të ngritura në Washington DC.

Avokatët e ish-presidentit kanë argumentuar se veprimet e pretenduara të Trump mbi rezultatet e zgjedhjeve të vitit 2020 ishin pjesë e detyrave të tij zyrtare në atë kohë dhe për këtë arsye ai mbrohet nga imuniteti presidencial.

Prokurorët gjithashtu i kërkuan gjykatës të vendosë nëse Trump mbrohet nga një rrezik i dyfishtë. Avokatët mbrojtës kanë pohuar se për shkak se Trump u lirua nga Senati gjatë gjyqit të tij të shkarkimit, ai nuk mund të gjykohet penalisht për të njëjtat veprime të supozuara.

Nëse Gjykata e Lartë do të merrte çështjen, çështja e imunitetit të presidentit do të anashkalonte vendimin nga një gjykatë apeli.

Ekipi i Trump kishte kërkuar nga gjykata e apelit javën e kaluar që të shqyrtonte vendimin e Chutkan dhe gjithashtu i kërkoi Chutkan të pezullonte të gjitha datat e gjyqit ndërkohë.

Çështja në lidhje me mbrojtjen presidenciale që Trump shpreson të përdorë si pjesë e mbrojtjes së tij duhet të zgjidhet përpara se Trump të shkojë në gjyq, i cili aktualisht është planifikuar për në mars 2024.

“Apeli i të paditurit për vendimin që refuzon imunitetin e tij dhe pretendimet e lidhura me të, megjithatë, pezullon gjykimin e akuzave kundër tij, të planifikuar të fillojë më 4 mars 2024,” shkroi ekipi i Smith.

“Është e një rëndësie të domosdoshme publike që pretendimet e të paditurit për imunitet të zgjidhen nga kjo Gjykatë dhe që gjykimi i të paditurit të vazhdojë sa më shpejt që të jetë e mundur nëse kërkesa e tij për imunitet refuzohet.”

Deklarimi vazhdon, “pretendimet e të paditurit janë thellësisht të gabuara, siç u shpreh gjykata e rrethit. Por vetëm kjo Gjykatë mund t’i zgjidhë ato përfundimisht.”