Kryetari i Komunës së Prizrenit, Mytaher Haskuka së bashku me drejtorin e Drejtorisë së Urbanizmit dhe Planifikimit Hapësinor, Beni Kizolli, të premten kanë mbajtur një konferencë për medie, për ta njoftuar opinionin publik se kallëzimi penal i ngritur drejtorit të DUPH-së Beni Kizolli, para disa muajsh, është hedhur poshtë nga ana e prokurorisë.

Me këtë rast, kryetari Haskuka ka thënë se rastet që po paraqiten si kallëzime penale ndaj drejtorëve të Komunës së Prizrenit, kur po hedhen poshtë nga ana e prokurorisë zakonisht nuk po ka njoftime në media. “Ashtu siç po ndodhë edhe në lidhje me kallëzimin penal të ngritur para disa muajsh ndaj drejtorit të DUPH-së, Beni Kizolli, i cili po ashtu është hedhur poshtë nga ana e prokurorisë”, ka thënë Haskuka.

Kryetari Haskuka ka theksuar se Komuna e Prizrenit do të ngritë kundër padi për humbjen e kohës, dezinformim të qytetarëve, shpifje dhe dëmtim të imazhit, ngase nuk kanë për qëllim sundimin e ligjit dhe mbrojtjen e qytetarëve, por njollosjen e qeverisëse tij.

Nga ana tjetër, duke folur për kallëzimin penal tashmë të hedhur poshtë, drejtori Kizolli ka thënë se përderisa një pjesë e objektit që gjendet në Qendrën Historike të Prizrenit kishte leje ndërtimore, një pjesë e tij ishte e ndërtuar gjatë vitit 2020 dhe se pronarët e objektit e kishin akuzuar për keqpërdorim të detyrës vetëm për shkak kërkesa e tyre nuk është trajtuar me ligjin e legalizimit, ku sipas tij, në fushëveprimin e ligjit tregohet shumë qartë se asnjë ndërhyrje pas datës së hyrjes në fuqi të ligjit nuk trajtohet fare.