Kryetari i Partisë Socialdemokrate, Dardan Molliqaj, ka shprehur mbështetje për protestën e veteranëve të Ushtrisë Çlirimtare të Kosovës kundër Gjykatës Speciale, e cila do të mbahet më 7 gusht.

Ai ka theksuar se besnikëria ndaj historisë së luftës çlirimtare është një nga sprovat më të rëndësishme për gjeneratën e tanishme dhe kjo është një kauzë që kalon çdo llogari politike.

Sipas Molliqajt, zhbërja e Gjykatës Speciale është mënyra e vetme për të sjellë drejtësi, pasi UÇK-ja nuk mund të gjykohet, ajo është themeli për të pasur drejtësi në të ardhmen.

“Për ne kuptimi i drejtësisë është zhbërja e kësaj gjykate. Për ta gjykuar UÇK-në, së pari duhet ta dyshojmë. Asnjë lloj verdikti që e supozon UÇK-në si të fajshme nuk sjellë drejtësi, pavarësisht përmbajtjes përfundimtare të tij. Sepse UÇK nuk mund të gjykohet. Ajo është kushti dhe mundësia për të pasur drejtësi në të ardhmen”, ka thënë Molliqaj.