Paris Saint-Germain e ka fituar trofeun e parë të vitit 2026, duke mposhtur Olympique Marseille pas penalltive, në ndeshjen e luajtur në Kuvajt për “Trophée des Champions”.

Koha e rregullt ka përfunduar 2-2, ndërsa portieri Lucas Chevalier është bërë heroi i PSG-së në serinë e penalltive. Marseille e ka nisur më mirë ndeshjen duke krijuar disa raste të rrezikshme, por Chevalier është dalluar herët me pritje vendimtare.

PSG ka kaluar në epërsi në minutën e pesëmbëdhjetë, kur Ousmane Dembele ka shënuar pas asistimit të Vitinha. Marseille ka reaguar dhe ka vazhduar ta kërkojë golin e barazimit. Pas disa rasteve të humbura, Mason Greenwood ka barazuar nga pika e bardhë. Në minutën e tetëdhjetë e shtatë, Marseille ka kaluar në epërsi 2-1 pas një autogoli të Willian Pachos, duke qenë shumë pranë fitimit të trofeut.

Megjithatë, PSG nuk është dorëzuar. Në minutat shtesë, Gonçalo Ramos e ka shënuar golin e barazimit 2-2, duke e çuar ndeshjen në penallti.

Në serinë e penalltive, Chevalier ka pritur dy goditje, ndërsa lojtarët e PSG-së janë treguar të saktë, duke i dhënë klubit trofeun e katërmbëdhjetëtë “Trophée des Champions”, rekord në historinë e garës.