Beteja financiare në mes tëParis Saint-Germain dhe Kylian Mbappe ka hyrë në një fazë të re këtë javë, me klubin francez që ka kundërsulmuar ligjërisht ish-sulmuesin e tyre. Mbappe, i cili u largua verën e kaluar si lojtar i lirë për t’iu bashkuar Real Madridit, kërkoi nga PSG-ja pagën për tre muajt e fundit si dhe disa bonuse të prapambetura. Fillimisht ai e fitoi betejën në gjykatë.

Në prill gjykata urdhëroi sekuestrimin e 55 milionë eurove nga llogaritë e PSG-së në favor të Mbappes, si pjesë e kërkesës së tij për kompensim financiar. Por PSG-ja nuk u dorëzua. Klubi francez ndërmori një hap të ri, duke kërkuar ndalimin e këtij sekuestrimi. Ata pretendojnë se Mbappe dhe avokatët e tij nuk kanë paraqitur prova të mjaftueshme për ta justifikuar këtë shumë.

Çështja do të shqyrtohet më 26 maj, por ndërkohë PSG-ja ka nisur edhe një kundërpaditje të fortë ndaj lojtarit. Ata kërkojnë një shumë marramendëse prej 98 milionë eurosh nga Mbappe.

Sipas avokatit të PSG-së, Renaud Semerdjian, kjo shumë kërkohet për “taktikat vonuese” të lojtarit, të cilat, sipas tyre, i kanë shkaktuar dëm financiar klubit. Ky është vetëm kapitulli i radhës në sagën e gjatë dhe të tensionuar mes Mbappes dhe ish-klubit të tij. Edhe pse largimi sportiv u realizua, pasojat ligjore dhe financiare po zvarriten. Mbetet për t’u parë se si do të përfundojë ky konflikt, i cili ka tërhequr vëmendjen e opinionit publik dhe medieve në të gjithë botën e futbollit.