Presidenti rus Vladimir Putin telefonoi sot pasdite presidentin turk Rexhep Tajip Erdogan dhe i përshkroi kërkesat e sakta të Rusisë për t’i dhënë fund pushtimit të Ukrainës.

Brenda gjysmë ore pas përfundimit të bisedës telefonike, BBC intervistoi këshilltarin dhe zëdhënësin e Erdoganit, Ibrahim Kalin. Kalin ishte pjesë e një grupi të vogël zyrtarësh që po “përgjonin” thirrjen.

Kërkesat ruse ndahen në dy kategori. Sipas Kalin, katër kërkesat e para ndaj Ukrainës nuk janë shumë të vështira për t’u përmbushur.

Kryesorja është pranimi i Ukrainës për të qenë neutral dhe për të mos aplikuar për t’u anëtarësuar në NATO. Presidenti ukrainas Volodymyr Zelensky tashmë ka rënë dakord për këtë.

Ka edhe kërkesa të tjera në këtë kategori që më së shumti duket se janë elementë që i “shpëtojnë fytyrën” palës ruse. Ukraina do të duhet të kalojë një proces çarmatimi për t’u siguruar që nuk përbën kërcënim për Rusinë. Duhet të ketë mbrojtje për gjuhën ruse në Ukrainë. Dhe ka atë që quhet denazifikimi.

Kjo është thellësisht ofenduese për Zelenskyn, i cili gjithashtu është hebre dhe të afërmit e të cilit vdiqën në Holokaust, por pala turke beson se Zelensky do ta pranojë. Mund të jetë e mjaftueshme që Ukraina të dënojë të gjitha format e neo-nazizmit dhe të premtojë se do t’i shtypë ato, shkruan BBC.

Kategoria më e rëndë

Kategoria e dytë është ajo në të cilën mund të ketë vështirësi dhe në një bisedë telefonike, Putin tha se do të nevojiten negociata të drejtpërdrejta mes tij dhe Presidentit Zelensky përpara se të arrihet një marrëveshje për ato pika. Zelensky ka thënë tashmë se është gati të takohet me presidentin rus dhe të negociojë me të kokë më kokë.

Kalin ishte shumë më pak specifik për këto çështje, duke thënë thjesht se bëhej fjalë për statusin e Donbasit, në Ukrainën lindore, pjesë të të cilit tashmë ishin ndarë nga Ukraina. Edhe pse Kalin nuk hyri në detaje, supozohet se Rusia do të kërkojë që qeveria ukrainase të heqë dorë nga territori në Ukrainën lindore. Kjo do të jetë thellësisht e diskutueshme.

Supozimi i dytë është se Rusia do të kërkojë që Ukraina të pranojë zyrtarisht që Krimea, të cilën Rusia e aneksoi ilegalisht në vitin 2014, i përket me të vërtetë Rusisë. Nëse është kështu, do të jetë një “pilulë e hidhur për t’u gëlltitur” për Ukrainën.

BBC: Pozicioni i Putinit tashmë është dobësuar

Kërkesat e Putinit nuk janë aq të ashpra sa disa njerëz kishin frikë dhe vështirë se janë të denja për gjithë dhunën, gjakderdhjen dhe shkatërrimin që Rusia ka vizituar në Ukrainë, shkruan BBC.

Duke pasur parasysh kontrollin e tij të fortë mbi mediat ruse, nuk duhet të jetë shumë e vështirë për të dhe bashkëpunëtorët e tij që të portretizojnë të gjitha këto si një fitore të madhe. Megjithatë, edhe nëse ai arrin ta paraqesë marrëveshjen me Ukrainën si një fitore të lavdishme ndaj neonazizmit, pozita e tij në vend do të dobësohet.