Qeverisë së Kosovës ka aprovuar kërkesën e ministrit të Bujqësisë, Pylltarisë dhe Zhvillimit Rural, Faton Peci për kompensimin e dëmeve në sektorin e bujqësisë të shkaktuara nga fatkeqësitë natyrore për periudhën janar – tetor 2021 me vlerë të mjeteve rreth 1.7 milion euro.

Këto mjete do të ndahen për 2 460 fermerë nga gjithsej 29 komuna të Kosovës, të cilët janë përzgjedhur në bashkëpunim të ngushtë me komisionet e përcaktuara nga komunat përkatëse.

Përmes këtij buxheti, fermerët do të kompensohen me 36 për qind për dëmet e shkaktuara në ekonomitë e tyre familjare kryesisht në sektorin e hortikulturës, në fushë të hapur dhe në sera.

Ky është vendimi i dytë i Qeverisë së Kosovës brenda 4 muajve lidhur me kompensimin e dëmeve në bujqësi pasi me vendimin e parë kemi kompensuar dëmet në vlerë prej rreth 1.3 milion për periudhën korrik – dhjetor 2020 apo 30 për qind të vlerës së totalit prej rreth 4.3 milion euro.