Qeveria në detyrë e Republikës së Kosovës ka mbajtur mbledhjen e saj të 264-të, gjatë së cilës ka miratuar vendime të rëndësishme për investime në infrastrukturë, arsim, kulturë dhe punësim.

Në këtë mbledhje është marrë vendimi për rialokimin e 1.2 milion eurove për dhjetë projekte kapitale në komunat Dragash, Ferizaj, Gjakovë, Han i Elezit, Klinë, Mitrovicë, Podujevë, Shtime, Prizren dhe Mamushë.

Ky financim vjen në kuadër të Programit për Zhvillim Rajonal 2025, me synim nxitjen e zhvillimit të qëndrueshëm dhe të balancuar social e ekonomik në të gjitha rajonet e vendit.

Qeveria ka miratuar edhe nismën për lidhjen e një marrëveshjeje granti në vlerë prej 1 milion dollarësh me Asociacionin Ndërkombëtar për Zhvillim.

Ky grant do të shërbejë për përgatitjen e projektit “Nxitja dhe Levimi i Mundësive për Sigurinë e Ujit – Faza 2”, që do të ndihmojë Kosovën në ndërtimin e një kornize kombëtare për sigurinë e digave. Projekti do të zbatohet nga Ministria e Mjedisit, Planifikimit Hapësinor dhe Infrastrukturës.

Ndër të tjera, Qeveria ka aprovuar edhe kërkesën e Ministrisë së Kulturës, Rinisë dhe Sportit për të transferuar 712 mijë e 215 euro për mbulimin e obligimeve ndaj Federatës së Volejbollit dhe Komitetit Olimpik të Kosovës, në bazë të Memorandumit të Mirëkuptimit ndërmjet palëve.

Në kuadër të Pakos së Ringjalljes Ekonomike janë ndarë edhe 2 milionë euro për mbështetjen e punësimit të qytetarëve nga komunitetet joshumicë në të gjithë vendin, përmes masës 1.9 që synon përfshirjen dhe integrimin ekonomik të këtyre komuniteteve.

Qeveria ka ritheksuar rëndësinë e vazhdimit të investimeve për zhvillim të barabartë dhe gjithëpërfshirës në të gjithë territorin e Republikës së Kosovës.