Ramize Sinani-Shala ka zyrtarizuar kandidaturën e saj për deputete të Kuvendit të Republikës së Kosovës nga Partia Demokratike e Kosovës (PDK), për zgjedhjet parlamentare të 28 dhjetorit.

Bashkim Hoxhaj, në një reagim publik, ka vlerësuar se Sinani-Shala përfaqëson një profil të dëshmuar të angazhimit shoqëror, institucional dhe politik. Ai ka kujtuar se ajo iu bashkua Ushtrisë Çlirimtare të Kosovës në moshën 18-vjeçare, duke dhënë kontribut në luftë për lirinë e vendit.

Pas përfundimit të luftës, Sinani-Shala vazhdoi studimet dhe karrierën profesionale, duke u angazhuar në aktivitete kulturore e politike. Aktualisht, ajo ushtron detyrën e Drejtoreshës së Sigurisë dhe Emergjencave në Komunën e Prizrenit, pozitë në të cilën, sipas Hoxhajt, ka treguar profesionalizëm, integritet dhe korrektësi në shërbim të qytetarëve.

Hoxhaj thekson se përvoja e saj nga fusha e betejës, studimet dhe menaxhimi institucional e bëjnë Sinani-Shalën një vlerë të shtuar për Kuvendin e Kosovës, veçanërisht në procesin e ligjbërjes.

Në fund, ai i uron sukses Sinani-Shalës dhe kandidatëve të tjerë të PDK-së në zgjedhjet e ardhshme, duke theksuar se mbështetja për ta përfaqëson, siç është shprehur ai, “votë për ndryshim dhe perspektivë më të mirë”.