Instituti amerikan për strategji dhe politika, “New Lines Institute”, ka publikuar së fundmi një raport të detajuar mbi marrëdhëniet ndërmjet Kosovës dhe Shteteve të Bashkuara të Amerikës gjatë 25 viteve të fundit.

Sipas raportit, roli i ShBA-së në Kosovë ka evoluar nga një mbështetje aktive për krijimin e shtetit të ri drejt një pozicioni mbikëqyrës, duke monitoruar status quo-në në rajon.

Megjithatë, Kosova ka shënuar përparime të dukshme në konsolidimin e demokracisë së saj dhe është renditur si shteti më demokratik në Ballkanin Perëndimor sipas Indeksit të Demokracisë Liberale të V-Dem.

Raporti thekson rëndësinë e angazhimit të ShBA-së me partitë kryesore në Kosovë, duke përfshirë Vetëvendosjen, qoftë në pushtet apo në opozitë, si partner të barabartë dhe duke njohur qëndrimet e saj mbi interesat sovrane të vendit.

“Uashingtoni do të kishte përfitim nëse do të përdorte përvojën e diplomacisë së tij të kaluar në Kosovë për të përmirësuar qasjen ndaj qeverisë së Prishtinës në të tashmen dhe të ardhmen”, thuhet në raport.

Raporti vlerëson se ShBA-ja duhet të vazhdojë të mbështesë dialogun politik Kosovë-Serbi, por pa toleruar korrupsionin dhe kapjen e shtetit. Pavarësisht sfidave të brendshme dhe mosmarrëveshjeve të gjatë me Serbinë, Kosova ka arritur progres të dukshëm në shumë fusha.

Një element i rëndësishëm i raportit është ndryshimi në qasjen e Kosovës ndaj ShBA-së.

Sipas institutit, nën qeverisjen e Vetëvendosjes, Prishtina ka treguar më shumë gatishmëri për të thënë “jo” ndaj kërkesave të aleatit kryesor kur ato bien ndesh me interesat strategjike të vendit. Ky raport nënvizon nevojën për një marrëdhënie më të balancuar dhe strategjike midis dy vendeve, duke ruajtur bashkëpunimin pa komprometuar sovranitetin e Kosovës.

Në përmbledhje, raporti i “New Lines Institute” evidenton rëndësinë e mbështetjes së SHBA-së për zhvillimin demokratik të Kosovës, duke theksuar një qasje më të kujdesshme dhe të ndërsjellë në marrëdhëniet dypalëshe.