A do të rikthehet Milot Rashica në Bundesligë pas katër vitesh mungesë? Sipas gazetarit turk Safak Malatya, disa klube gjermane kanë shprehur interes për sulmuesin anësor nga Kosova.

Rashica aktualisht është pjesë e Besiktasit, ku ka bërë një sezon të mirë. Ai është transferuar nga Werder Bremen te Norwich City në vitin 2021 për 11 milionë euro, përpara se të kalonte në Superligën turke.

Ndër skuadrat e interesuara për shërbimet e tij përmendet veçanërisht Borussia Mönchengladbach, e cila po kërkon alternativa në repartin ofensivë.

Kjo lidhet me përgatitjet për një largim të mundshëm të Alassane Plea, sulmuesit francez 32-vjeçar, i cili pritet të largohet nga klubi gjatë afatit kalimtar veror.

Rashica ka regjistruar 5 gola dhe 12 asistime në 41 ndeshje zyrtare me fanellën e Besiktasit në edicionin 2024/25, duke qenë një nga lojtarët me kontributin më të madh te skuadra turke.

Sipas vlerësimeve të fundit në tregun e transferimeve, vlera e tij është rreth 7.5 milionë euro, ndërsa ka kontratë të vlefshme me Besiktasin deri në vitin 2027.

Një rikthim i mundshëm në Bundesligë do të ishte një hap interesant në karrierën e Rashicës, por për momentin, nuk ka ende ndonjë ofertë konkrete në tavolinë.