Rrëmbimi i presidentit të Venezuelës, Nicolas Maduro, nga forcat amerikane më 3 janar ka nxitur reagime të forta globale dhe një seancë emergjente të Këshillit të Sigurimit të OKB-së.

Edhe disa aleatë të ShBA-së kanë shprehur shqetësim dhe dënim ndaj veprimit, shkruan Aljazeera.

Maduro u paraqit para një gjykate federale në Nju Jork, ku u deklarua i pafajshëm për akuzat për trafik droge dhe u vetëquajt “i burgosur lufte”. Me të është arrestuar edhe bashkëshortja e tij, Cilia Flores, e cila sipas avokatit kishte shenja lëndimesh fizike të marra gjatë operacionit.

Në Venezuelë janë shënuar protesta në mbështetje të Maduros, ndërsa parlamenti i ri nisi punimet mes thirrjeve pro tij. Sindikata e gazetarëve njoftoi se 14 punonjës mediash u ndaluan përkohësisht gjatë mbulimit të protestave, duke ngritur shqetësime për lirinë e medias.

Ndërkohë, liderja e opozitës dhe fituese e Çmimit Nobel për Paqen, Maria Corina Machado, deklaroi se planifikon të kthehet në Venezuelë së shpejti dhe hodhi poshtë autoritetin e qeverisë së përkohshme.

Kriza politike në Venezuelë mbetet e tensionuar, me pasoja të paqarta për stabilitetin rajonal.