Sekretari i përgjithshëm i NATO-s, Mark Rutte, i ka ardhur në mbrojtje të presidentit amerikan, Donald Trump gjatë një aktiviteti të Forumit Ekonomik Botëror, duke e lavdëruar atë për shtyrjen e Evropës drejt marrjes së “hapave thelbësorë” në lidhje me shpenzimet e saj për mbrojtjen, shkruan “CNN”.

Duke folur në një panel të titulluar “A mund të mbrohet Evropa vetë?” së bashku me disa liderë evropianë, Rutte ka pyetur audiencën nëse ata “mendojnë vërtet se, pa Donald Trump”, disa vende evropiane do t’i kishin rritur shpenzimet e tyre për mbrojtjen.

“Aspak. Pa Donald Trump, kjo nuk do të kishte ndodhur kurrë”,ka thënë ai.

Duke iu drejtuar audiencës, Rutte ka thënë: “Nuk jam popullor te ju tani sepse po e mbroj Donald Trumpin, por vërtet besoj se mund të jemi të lumtur që ai është aty, sepse ai na ka detyruar ne në Evropë të ndërmarrim hapa për t’i përballuar pasojat dhe për t’u kujdesur më shumë për mbrojtjen tonë”.

ShBA-ja ende ka dhjetëra mijëra trupa në Evropë, ka thënë Rutte, gjë që tregon se ajo është “ende thellësisht e investuar në mbrojtjen evropiane”.

Ndërsa Uashingtoni gjithashtu planifikon të vendosë më shumë trupa në Azi, është “vetëm logjike që ata të presin që ne në Evropë të ndërmarrim hapa me kalimin e kohës”.

Evropa do të punojë drejt marrjes së më shumë kapaciteteve mbrojtëse në kontinent, ndërsa një prezencë “e fortë, konvencionale” e ShBA-së gjithashtu do të mbetet atje, sipas shefit të NATO-s.

“Por përsëri, jam plotësisht i bindur se pa Donald Trump, ne nuk do t’i kishim marrë ato vendime, dhe ato janë thelbësore, veçanërisht për anën evropiane dhe kanadeze të NATO-s për t’u rritur vërtet në botën pas Luftës së Ftohtë”, ka thënë Rutte.