ancelari në largim i Gjermanisë, Olaf Scholz, ndodhet sot në Varshavë ku takoi kryeministrin polak Donald Tusk, tha qeveria polake në mediat sociale, duke postuar një foto nga takimi i dyshes.

Për këtë vizitë të Scholz pas konstituimit të Bundestagut, agjencia gjermane e shtypit “DPA” tha se ishte e pazakontë që takimi të ndodhte vetëm një javë para largimit të Scholz dhe siç u paralajmërua ajo pritej të fokusohej në gjendjen e marrëdhënieve gjermano-polake dhe çështjet europiane.

“Që nga sesioni inaugurues në fund të marsit të dhomës së ulët të parlamentit gjerman, Bundestagut, Scholz ka shërbyer në një rol kujdestar. Udhëtimet e huaja janë të rralla në fazën përfundimtare të mandatit të një kancelari, përveç nëse përfshijnë takime ndërkombëtare”, shkroi ky medium.

Në fillim të këtij muaji, Scholz bëri një udhëtim të ngjashëm në Madrid për t’u takuar me kryeministrin spanjoll Pedro Sánchez.

Scholz pritet të largohet nga posti në fillim të majit dhe do të pasohet nga lideri konservator Friedrich Merz, duke iu nënshtruar miratimit zyrtar të një marrëveshjeje koalicioni midis CDU/CSU të Merz-it dhe Social Demokratëve.

Merz më parë tregoi synimin e tij për të përmirësuar marrëdhëniet dypalëshe me Poloninë, e cila renditet gjithashtu si një partner prioritar në marrëveshjen e koalicionit.