Analisti Dardan Sejdiu, ka nxjerr në pah realitetin ekonomik dhe social të Kosovës, larg imazheve të “suksesit” të prezantuar nga qeveria e Kurtit.

Sipas Sejdiut, situata e qytetarëve është alarmante: rreth 90 000 familje përballen me nevojën për subvencione të dimrit për faturat e rrymës, ndërsa 48 për qind e qytetarëve nuk mund të përballojnë asnjë shpenzim të papritur prej 200 eurosh.

Një pjesë e madhe e shtëpive, rreth 21.6 për qind, jetojnë vetëm me batanije për të ngrohur dhomat, ndërsa 42.2 për qind e qytetarëve e shohin mishin si luks dhe nuk e konsumojnë më shumë se tre herë në javë.

Sejdiu ka theksuar gjithashtu se 44.6 për qind e familjeve kanë borxhe ndaj bankave, një barrë që rëndon dukshëm jetesën e tyre, ndërsa gratë kryejnë mesatarisht 6.2 orë punë të papaguar çdo ditë nëpër shtëpi, duke mbajtur në këmbë një ekonomi që shteti duket se e ka harruar.

“Kur i sheh këto shifra, fjala “begati” që e përdor kjo qeveri nuk është veç një gabim i vogël retorik. Është diagnozë e një shteti që i ka ngatërru dritat e neonit me ngrohtësinë e vërtetë të shtetit! Shteti që u bë arkëtar i pareve dhe votës së diasporës, po harroi me u bë arkitekt i jetës më të mirë në Kosovë. Mos u rreni! Nuk jemi tu u zhvillu, jemi tu u fikë kadale, me një karamelë në gojë gjatë verës, dy gjatë dimrit, e me sytë nga valixhja dhe bileta një drejtimshe! Rruga e mbarë? E kismet, po shihemi në terminal”, ka shkruar Sejdiu në “Facebook”.