Kërkesa për masë të përkohshme lidhur me procesin e konstituimit të Kuvendit është deponuar këtë të hënë në Gjykatën Kushtetuese, ndërsa vendimi i kësaj gjykate pritet të jetë përcaktues për tejkalimin e bllokadës institucionale.

Njohësi i çështjeve juridike nga Instituti i Kosovës për Drejtësi (IKD), Gzim Shala, ka thënë se tejkalimi i afateve të përcaktuara me Kushtetutë përbën shkelje kushtetuese.

“Tejkalimi i çdo afati të paraparë në Kushtetutë është i pakuptimtë dhe është shkelje kushtetuese. Në aktgjykimet e kaluara, Gjykata Kushtetuese nuk e kishte përcaktuar se cilat janë pasojat juridike për shkeljen e këtij afati”, ka deklaruar Shala.

Sipas tij, tashmë Gjykata Kushtetuese e ka mundësinë që të qartësojë nëse tejkalimi i këtyre afateve sjell pasoja juridike dhe cilat do të ishin ato.

“Tash e ka mundësinë para vetes që të tregojë nëse ka pasoja juridike përkitazi me këtë çështje, dhe nëse po, cilat janë ato pasoja juridike”, tha Shala.