ShBA ka dërguar trupa ushtarak në Nigeri. Kështu ka deklaruar të martën gjenerali përgjegjës për komandën amerikane për Afrikën, Dagvin RM Anderson. Ky është dërgimi i parë i forcave amerikane në terren që kur Uashingtoni goditi nga ajri ditën e Krishtlindjeve.

Presidenti amerikan Donald Trump urdhëroi sulme ajrore ndaj atyre që ai i përshkroi si objektiva të Shtetit Islamik në Nigeri në dhjetor dhe tha se mund të ketë më shumë veprime ushtarake amerikane atje.

Gjenerali i lartë tha se ekipi amerikan u dërgua pasi të dy vendet ranë dakord se duhej bërë më shumë për të luftuar kërcënimin terrorist në Afrikën Perëndimore.

“Kjo ka çuar në një bashkëpunim më të madh midis kombeve tona për të përfshirë një ekip të vogël amerikan që sjell disa aftësi unike nga Shtetet e Bashkuara”, u tha gazetarëve gjenerali.

Anderson nuk dha detaje të mëtejshme rreth madhësisë dhe fushëveprimit të misionit të tyre. Ministri i Mbrojtjes Christopher Musa konfirmoi se një ekip po punonte në Nigeri, por nuk dha detaje të mëtejshme.

Një ish-zyrtar amerikan tha se ekipi amerikan duket se ishte shumë i përfshirë në mbledhjen e inteligjencës dhe në mundësimin e forcave nigeriane për të goditur grupet e lidhura me terroristët.

Nigeria është vënë nën presion të fortë nga Uashingtoni për të vepruar pasi Presidenti Trump akuzoi kombin e Afrikës Perëndimore se nuk ka mbrojtur të krishterët nga militantët islamikë që veprojnë në veriperëndim.

Qeveria nigeriane mohon çdo persekutim sistematik të të krishterëve, duke thënë se po synon luftëtarët islamistë dhe grupe të tjera të armatosura që sulmojnë civilët si të krishterë ashtu edhe myslimanë.