Skuadra shqiptare nga Tetova, Shkëndija, të martën do të përballet me kampionin e Azerbajxhanit, Qarabag, në ndeshjen e parë të raundit të tretë kualifikues për Ligën e Kampionëve. Në prag të këtij dueli të rëndësishëm, trajneri Jeton Beqiri dhe kapiteni Besart Ibraimi kanë folur para gazetarëve në konferencën për shtyp, duke shprehur besimin e tyre për një paraqitje dinjitoze.

Jeton Beqiri ka thënë se skuadra e tij respekton kundërshtarin, mbi të gjitha respekton vetveten dhe fanellën që përfaqëson: “Duhet të paraqitemi në nivelin më të lartë të mundshëm në Ligën e Kampionëve. Besoj se kemi shanset tona, por duhet të jemi maksimalisht të fokusuar dhe agresivë në lojë. Çdo rast duhet shfrytëzuar. Kjo ndeshje nuk do të vendosë gjithçka, por një rezultat pozitiv do të na ndihmonte shumë për sfidën e kthimit”.

Ndërsa kapiteni Besart Ibraimi theksoi vetëbesimin dhe unitetin brenda ekipit: “Ne besojmë në forcat tona dhe shpresojmë ta vazhdojmë këtë rrugëtim. Qarabagu është kundërshtar i fortë, por edhe ne kemi cilësi dhe do ta japim maksimumin për t’u kualifikuar”. Ndërkohë, në shortin e hedhur sot në Nion të Zvicrës, UEFA ka përcaktuar edhe skemën për fazën “play-off” të Ligës së Kampionëve. Fituesi i çiftit Shkëndija – Qarabag do të përballet me fituesin e ndeshjes Ludogorets (Bullgari) – Ferencvaros (Hungari). Në rast eliminimi nga Qarabagu, Shkëndija do ta ketë sërish njërin prej këtyre dy kundërshtarëve në rrugën e kampionëve të Ligës së Evropës. Ndeshja Shkëndija – Qarabagu luhet të martën në Arenën “Todor Proeski” në Shkup me fillim nga ora 20:00.