Shoqata e Prokurorëve të Republikës së Kosovës ka reaguar pas deklaratave publike të deputetes së Kuvendit të Kosovës, znj. Fitore Pacolli, drejtuar ndaj Kryeprokurorit të Prokurorisë Speciale, z. Blerim Isufaj.

Në reagimin e saj, Shoqata shpreh shqetësim për gjuhën e përdorur nga deputetja Pacolli dhe thekson se: “Deklarata të tilla janë të pabazuara dhe të pavërteta, të cilat cenojnë integritetin e sistemit prokurorial dhe minojnë besimin e qytetarëve në institucionet e drejtësisë.” Shoqata nënvizon se çdo përpjekje për të vënë në shënjestër prokurorët përmes deklaratave politike përbën sulm ndaj pavarësisë së institucionit të Prokurorisë dhe, si i tillë, është i papranueshëm.