Pesë vende evropiane thanë të enjten, në një deklaratë të përbashkët me Japoninë, se do të merrnin masa për të stabilizuar tregjet e energjisë dhe se janë gati të ndihmojnë në sigurimin e kalimit të sigurt përmes Ngushticës së Hormuzit.

Britania, Franca, Gjermania, Italia, Holanda dhe Japonia dënuan sulmet e fundit të Iranit dhe i bënë thirrje Teheranit që të ndalojë menjëherë veprimet e tij.

“Liria e lundrimit është një parim themelor i së drejtës ndërkombëtare, duke përfshirë Konventën e Kombeve të Bashkuara mbi Ligjin e Detit”, theksuan ata.

“Siguria detare dhe liria e lundrimit u sjellin dobi të gjitha vendeve. Ne u bëjmë thirrje të gjitha shteteve të respektojnë të drejtën ndërkombëtare dhe të mbështesin parimet themelore të prosperitetit dhe sigurisë ndërkombëtare”, deklaruan ata.