Gjykata Kushtetuese e Shqipërisë ka pezulluar dekretin e presidentit Bajram Begaj për zhvillimin e zgjedhjeve të pjesshme vendore më 9 nëntor në Tiranë.

Vendimi është marrë pasi Erion Veliaj ka ankimuar shkarkimin e tij si kryetar i Bashkisë së Tiranës.

Gjykata Kushtetuese ka vendosur njëzëri të kalojë çështjen me kërkues Erion Veliaj në seancë plenare publike në datë 31 tetor 2025 dhe të pezullojë dekretin e presidentit për pjesën që cakton datën e zgjedhjeve në Bashkinë Tiranë, raporton “A2CNN”.

Veliaj është shkarkuar nga Këshilli i Ministrave pas kërkesës së Këshillit Bashkiak të Tiranës, me arsyetimin se kishte munguar në punë. Veliaj është duke qëndruar në paraburgim prej shkurtit të këtij viti, pasi është duke u akuzuar nga SPAK-u për korrupsion dhe pastrim parash.