Kryeministri britanik Keir Starmer ka njoftuar një shtesë prej 10 milionë funte në fonde sigurie për të mbrojtur komunitetet myslimane në Mbretërinë e Bashkuar, përballë një rritjeje të ndjeshme të incidenteve të urrejtjes me synim myslimanët dhe xhamitë.

Njoftimi u bë gjatë vizitës së tij në Peacehaven Mosque në East Sussex, e cila kishte qenë viktimë e një sulmi të dyshuar me zjarrvënie më 4 tetor. Askush nuk u lëndua, por zjarri dëmtoi hyrjen e përparme të xhamisë dhe një makinë të parkuar pranë. Policia e trajton rastin si krim urrejtjeje.

Paratë shtesë do të përdoren për masa të përforcuara sigurie për xhamitë, qendrat islame dhe shkollat e besimit mysliman, të tilla si kamera CCTV, sisteme alarmi, gardhe të sigurta dhe staf sigurie.

Sipas qeverisë britanike, krimet e urrejtjes ndaj myslimanëve janë rritur me 19 % në vitin që përfundon në mars 2025, dhe myslimanët përbëjnë 44 % të të gjithë krimeve të motivuara fetarisht, raporton the guardian.

“Britania është një vend krenar dhe tolerant. Sulmet ndaj çdo komuniteti janë sulme ndaj të gjithë kombit tonë dhe vlerave tona,” tha Starmer. “Ky financim do t’u ofrojë komuniteteve myslimane mbrojtjen që u nevojitet dhe që meritojnë, duke u lejuar atyre të jetojnë në paqe dhe siguri. Dua një Britani të ndërtuar për të gjithë dhe qeveria ime është e përkushtuar për të ofruar rrugë më të sigurta për të gjithë – kjo do të thotë mbrojtje e vendeve të adhuruarit nga ata që kërkojnë të na ndajnë përmes urrejtjes dhe dhunës.”