Studentët e Fakultetit të Shkencave Organizative (FON) në Universitetin e Beogradit, që ndodhen në bllokadë tashmë prej disa javësh, kanë reaguar ashpër ndaj vendimit të Këshillit Mësimor-Shkencor të këtij fakulteti për të nisur me kompensimin e orëve të humbura mësimore nga data 19 maj.

“Në jemi thellësisht të zhgënjyer nga vendimi i Këshillit Mësimor-Shkencor të fakultetit tonë, i cili është marrë në mënyrë tërësisht jotransparente, pa konsultim me studentët dhe në kundërshtim me vullnetin tonë. Veprimet e tilla janë në kundërshtim të plotë me parimet mbi të cilat duhet të ndërtohet një komunitet akademik”, thuhet në deklaratën e përbashkët të studentëve të FON-it të cilët janë pjesë e bllokadës.

Ata theksojnë se ky vendim nuk përfaqëson qëndrimin e Plenumit të Studentëve të FON-it dhe paralajmërojnë se mësimi nuk do të rifillojë pa pëlqimin e tyre.

“Fundi nuk do të vijë kur e vendosin individë të caktuar apo mediat e regjimit – fundi do të vijë kur ta vendosim ne. Nuk do të ketë rifillim të mësimit pa pëlqimin tonë, sepse nuk ka kthim në ‘normalitet’ përderisa e vërteta, përgjegjësia dhe drejtësia po fshihen. Nuk ka normalitet kur jemi nën presionin e mekanizmave represivë. Nuk do të tërhiqemi asnjë hap pas përderisa njerëz të akuzuar për plagjiaturë bëhen ministra, ndërsa profesorëve iu ndalet pagesa për punën shkencore”, thuhet më tej në deklaratë.

Në fund, studentët shprehin vendosmërinë e tyre për të vazhduar rezistencën:

“Në komunitetin akademik, respekti nuk fitohet me tituj, por me integritet, qëndrueshmëri dhe guxim për të qëndruar në anën e drejtësisë. Vendosmëria jonë nuk është thyer – përkundrazi, është forcuar! Çdo përpjekjeje për manipulim do t’i përgjigjemi më të organizuar, më të qartë dhe më të vendosur. Ne nuk lodhemi, sepse e dimë për çfarë luftojmë – për drejtësi për viktimat dhe për një shtet ku duam të jetojmë.”

Që nga fundi i vitit 2023, Serbia është përfshirë nga një valë protestash të gjera studentore dhe qytetare, të cilat kanë marrë hov të ri pas ngjarjeve tragjike në maj 2023 – përfshirë sulmet me armë në shkolla dhe rritjen e pakënaqësisë ndaj mënyrës së menaxhimit të krizave nga autoritetet. Lëvizja e studentëve është bërë një nga shtyllat kryesore të rezistencës ndaj qeverisë së presidentit Aleksandar Vučić, të cilën e akuzojnë për autoritarizëm, kapje të institucioneve dhe mungesë të llogaridhënies.

Protestat janë intensifikuar pas emërimeve kontroverse në qeveri, ku figura të akuzuara për plagjiaturë janë bërë pjesë e kabinetit, si dhe pas rasteve të cenimit të lirisë akademike dhe represionit ndaj profesorëve kritikë. Në këtë kontekst, shumë fakultete në Universitetin e Beogradit – përfshirë FON-in – kanë hyrë në greva, bllokada dhe forma të ndryshme të mosbindjes civile.

Studentët kërkojnë jo vetëm ndryshime në udhëheqje, por një reformim të thellë të sistemit politik dhe arsimor në Serbi, me fokus në drejtësi, transparencë dhe respekt për vlerat demokratike.