Kandidati i PDK-së për kryetar të Mitrovicës, Arian Tahiri, ka deklaruar se gara e tij zgjedhore është fokusuar ekskluzivisht në interesin e qytetit dhe qytetarëve të Mitrovicës.

I ftuar në emisionin “Jehona Politike” në Klan Kosova, ai theksoi se që nga dita e parë ka qenë i përkushtuar të prezantojë një program konkret për vitet 2025-2029, duke takuar grupe të shumta qytetarësh për të inkorporuar idetë e tyre në planin zhvillimor.

“Për mua kjo ka qenë një garë për qytetin e Mitrovicës, garë që e kam ndje që në ditën e parë me qytetarët, për qytetin, për shkak se kam garuar me qëllim të qartë, me i fitu zgjedhjet dhe me qeverisë për periudhën 2025-2029 me një planprogram konkret, specifik, të matshëm, të realizueshëm.

Gjithashtu participues në planprogramin tim kanë qenë qytetarët e Mitrovicës, për shkak se i kam takuar grupe të mëdha të tyre, me qëllim që me i marr mendimet dhe idetë e tyre që i vlerësojnë të dobishme për qytetarin. Tash do të vazhdojmë edhe për fazën tjetër që ta kapitalizojmë fitoren tonë të madhe, dhe të qytetit të Mitrovicës”, tha Tahiri.