Trent Alexander-Arnold është zyrtarisht lojtar i Real Madridit. Alexander-Arnold është prezantuar sot (e enjte) si lojtar i ri i “Los Blancos”, në objektet e stadiumit “Santiago Bernabeu”.

Presidenti i klubit, Florentino Perez, e mirëpriti atë në sallën e bordit të Real Madrid City, ku anglezi nënshkroi një kontratë që do ta mbajë në klub për gjashtë sezonet e ardhshme. Pas nënshkrimit të kontratës, Alexander-Arnold mori një replikë të stadiumit, një orë dore dhe një fanellë me emrin e tij dhe numrin 12 në pjesën e pasme.

“I dashur Trent Alexander-Arnold, mirësevjen në Real Madrid. Po jetojmë edhe një ditë shumë të rëndësishme, sepse një lojtar që ka fituar gjithçka dhe ka lënë gjurmë në një nga klubet më të mëdha të botës, Liverpool, po i bashkohet Real Madridit. Tani dëshiron të vazhdosh historinë tënde të dashurisë me futbollin te Real Madridi. Mund të kishe zgjedhur çdo klub në botë, por zgjodhe ne, dhe askush nuk do ta harrojë këtë”, ka thënë presidenti Perez.

Ndryshe, anglezi me ekipin e Liverpoolit gjatë 9 sezoneve pati 259 paraqitje, 18 gola dhe 64 asistime, me një rekord skuadre prej 171 fitoresh, 54 barazimesh dhe 34 humbjesh. Transferimi i tij i fundit te Real Madrid për 10 milionë euro, i konfirmuar në maj 2025, ka shkaktuar reagime të përziera midis tifozëve të Reds, me disa të zhgënjyer dhe të tjerë mbështetës të sfidës së tij të re.