Trashëgimia e ikonës së pop-it, Michael Jackson, është rikthyer në vëmendjen publike pas zhvillimeve të fundit ligjore që po tronditin pasurinë e tij dhe familjen.

Trashëgimia e ikonës së pop-it, Michael Jackson, është rikthyer në vëmendjen publike pas zhvillimeve të fundit ligjore që po tronditin pasurinë e tij dhe familjen.

43-vjeçari Wade Robson dhe 47-vjeçari James Safechuck, që më parë kanë akuzuar këngëtarin e famshëm për abuzim seksual në fëmijëri, tani po kërkojnë një dëmshpërblim prej 400 milionë dollarësh.

Sipas dokumenteve gjyqësore të paraqitura më 15 shtator, shifra e lartë ka intensifikuar përplasjet ligjore që përfshijnë jo vetëm pasurinë e Jackson-it, por edhe vajzën e tij, Paris Jackson, e cila thuhet se është kundër përdorimit të fondeve të trashëgimisë për të përballuar këto shpenzime gjyqësore.

Kujtojmë se paditësit kanë dalë për herë të parë publikisht me akuzat e tyre në dokumentarin e debatueshëm të HBO-së, “Leaving Neverland” (2019).

Wade Robson e ka ngritur padinë e tij fillimisht në vitin 2013 ndaj kompanive “MJJ Productions Inc”dhe “MJJ Ventures Inc”, duke pretenduar se ishte abuzuar në mënyrë të përsëritur nga mosha 7 deri në 14 vjeç.

Nga ana tjetër, James Safechuck ka deklaruar se ishte viktimë e Jackson-it që në moshën 10-vjeçare, pasi u njohën gjatë xhirimeve të një reklame për Pepsi. Ai ngriti padinë e tij një vit më pas, në 2014.

Reagimi i pasurisë së Jackson-it dhe ndarja brenda familjes

Trashëgimia e Michael Jackson-it ka mohuar vazhdimisht akuzat, duke i quajtur paditë “të pabaza”.

Megjithatë, pavarësisht këtij qëndrimi, ekzekutorët e pasurisë, John Branca dhe John McClain, paralajmërojnë në dokumentet ligjore se mosmbulimi i shpenzimeve ligjore mund të ketë pasoja serioze për stabilitetin financiar të trashëgimisë.

“Pasuria rrezikon të mos përmbushë detyrimet e saj në këtë rast. Mungesa e mbështetjes financiare për këtë proces mund të jetë katastrofike”, thuhet në dokumente.

Ndërkohë, Paris Jackson raportohet se është kundër që pasuria të mbulojë të gjitha kostot ligjore që rrjedhin nga këto akuza, duke nxjerrë në pah ndarje dhe tensione brenda familjes mbi mënyrën si duhet trajtuar kjo çështje.

Trashëgimia e Jackson-it është përballur edhe më herët me beteja ligjore të lidhura me dokumentarin e HBO-së. Në vitin 2024, një marrëveshje e arritur me rrjetin televiziv çoi në heqjen përfundimtare të “Leaving Neverland” nga platforma, gjë që u konsiderua si një fitore e pjesshme për trashëgiminë.

Megjithatë, paditë e reja të Robson dhe Safechuck sugjerojnë se çështjet ligjore që rrethojnë figurën e Michael Jackson-it nuk kanë përfunduar ende. Shuma e kërkuar prej 400 milionë dollarësh jo vetëm që përbën një kërcënim financiar të madh, por gjithashtu rikthen në qendër të debatit akuzat e vjetra që vazhdojnë të ndajnë opinionin publik.