Presidenti amerikan Donald Trump ka shpërthyer kundër rrjeteve televizive që raportojnë negativisht për të, duke sugjeruar se disa prej tyre mund të humbasin licencat e transmetimit.

Këto komente erdhën pasi rrjeti ABC pezulloi komedianin Jimmy Kimmel për deklaratat lidhur me vrasjen e aktivistit konservator Charlie Kirk.

Duke folur nga Air Force One, pas një vizite shtetërore në Britani, Trump tha: “Kam lexuar se 97% e raportimeve për mua janë negative, megjithatë fitova të gjitha shtetet kyçe në zgjedhjet e fundit. Këto rrjete kanë licenca, ndoshta duhet t’u hiqen.” Ai akuzoi mediat për shpifje dhe përhapje të urrejtjes kundër tij.

Pezullimi i Kimmel erdhi pas një monologu ku ai sugjeroi se vrasësi i Charlie Kirk mund të ishte një mbështetës i Trump. Autoritetet në Utah thanë se i dyshuari ishte i indoktrinuar me ideologji të majtë, çka shkaktoi një reagim të fortë në kampin konservator.

Komisioni Federal i Komunikimeve, i udhëhequr nga Brendan Carr reagoi menjëherë, duke e akuzuar Kimmel për “sjellje të sëmurë” dhe paralajmëroi rrjetin ABC për pasoja. Carr u shpreh se televizionet duhet të “marrin masa konkrete” ose të përgatiten për ndërhyrje rregullatore nga FCC.

Ai gjithashtu përgëzoi rrjetin Nexstar që ndaloi transmetimin e emisionit të Kimmel dhe bëri thirrje që edhe rrjete të tjera të ndjekin shembullin.