Trajneri i Anglisë, Thomas Tuchel, nuk ishte veçanërisht i kënaqur me performancën e skuadrës së tij në fitoren 2-0 ndaj Andorrës në kualifikueset për Kupën e Botës dhe duket se i ka “shënjestruar” tre lojtarë.

Tuchel i dha mesfushorit të Nottingham Forest, Elliot Anderson, debutimin e tij me Anglinë në “Villa Park”, dhe mesfushori ia shpërbleu besimin trajnerit me një performancë solide, e cila i solli atij edhe çmimin “Lojtari i Ndeshjes”.

Fitorja ishte relativisht e qetë për Anglinë, e cila pati vështirësi të thyejë mbrojtjen e vendosur të Andorrës deri në minutën e 25-të, kur një autogol i Christian Garcias hapi rezultatin.

Pjesa e dytë nuk solli shumë ndryshime për vendasit, të cilëve i mungoi intensiteti, përpara se Declan Rice të shënonte me kokë pas një asistimi perfekt nga Reece James, duke dyfishuar avantazhin dhe duke ruajtur rekord të pastër në kualifikimet për Botërorin 2026.

Sfidë më e vështirë për Tuchel pritet të vijë të martën kur Anglia udhëton në Beograd për t’u përballur me Serbinë. Bazuar në intervistat pas ndeshjes, pritet që mund të ketë ndryshime në skuadër.

Duke folur për “ITV Sport” pas ndeshjes në Birmingham, Tuchel duket se ka përmendur tre lojtarë që sipas tij mund të kishin dhënë më shumë ndaj Andorrës.

Megjithatë, ai nuk nguroi të lavdëronte debutimin e Anderson.

“[Anderson ishte] shumë i mirë, shumë, shumë i mirë,” tha Tuchel.

“Ishte pak nervoz këtë javë, por pastaj bëri mirë, dhe ne thamë ‘le të provojmë’, dhe ai e bëri.”

Por jo të gjithë morën fjalë pozitive nga trajneri. Tuchel shtoi:

“Mendoj se na munguan ato momente të vogla për të shpejtuar lojën. Ndoshta Eberechi Eze nuk pati ditën e tij më të mirë në numrin 10, pasimi i fundit nga Noni Madueke nuk ishte mjaft klinik, dhe Marcus Rashford pati momente të mira, por nuk arriti t’i shfrytëzonte. Këto gjëra mund të ndodhin kundër një ekipi të ngushtë. Goli i dytë duhej të vinte më herët sepse na jepte shumë liri. Ne kemi mësuar shumë dhe jam i kënaqur për lojtarët. Tani do të tregojmë diçka në Beograd.”

Disa lojtarë të skuadrës nuk luajtën fare në “Villa Park”, duke përfshirë Jordan Henderson, Dean Henderson, Jarrod Bowen, Djed Spence, Ruben Loftus-Cheek, Ollie Watkins dhe James Trafford, të cilët ndoqën ndeshjen nga stoli. Ata që munguan të shtunën do të shpresojnë të marrin minuta në Beograd të martën.

Me Jude Bellingham jashtë për shkak të një dëmtimi në shpatull, tani është momenti për mesfushorët qendrorë që të tregojnë vlerën e tyre dhe të kërkojnë një vend në ekipin e Tuchel.

Përveç lavdërimeve për Anderson, trajneri anglez la të kuptohet se mund ta fillojë atë ndaj Serbisë. Tuchel tha:

“Kjo ishte testi për të. Ne duam të kemi të gjitha opsionet për Beograd, menduam ‘le ta provojmë sot dhe të shohim nëse është gati’. Mendoj se e kaloi testin. Pse të mos luajë në Serbi?”./GazetaExpress/