Ukraina ka goditur një uzinë kimike ruse me raketa Storm Shadow, duke iu referuar armës me rreze të gjatë veprimi të prodhuar në Mbretërinë e Bashkuar. Lajmi u bë me dije nga ushtria ukrainase.

Duke e quajtur sulmin “një goditje të suksesshme” që depërtoi në sistemin rus të mbrojtjes ajrore, shtabi i përgjithshëm i forcave të armatosura të Ukrainës tha se ende po vlerësonte rezultatin e sulmit “masiv”.

Kremlini nga ana e tij ka paralajmëruar Perëndimin të mos i japë Ukrainës armë të afta për sulme me rreze të gjatë veprimi, por Kievi thekson domosdoshmërinë e tyre për synimin e objekteve ruse që luajnë një rol kyç në luftën e Moskës kundër Ukrainës.

“Uzina Kimike e Bryansk është një strukturë kyçe e kompleksit ushtarako-industrial të shtetit agresor”, tha ushtria ukrainase në një postim në X të martën.

Sulmi ndodhi në të njëjtën ditë kur kryeministri i Mbretërisë së Bashkuar, Sir Keir Starmer, dhe udhëheqës të tjerë evropianë u zotuan të “shtojnë presionin mbi ekonominë dhe industrinë e saj të mbrojtjes së Rusisë” derisa udhëheqësi rus Vladimir Putin “të jetë gati të bëjë paqe”.

Një deklaratë e përbashkët e bashkëfirmosur nga udhëheqësit ukrainas, gjermanë, francezë, italianë, polakë, danezë, finlandezë, të BE-së dhe norvegjezë, nënvizonte se “Ukraina duhet të jetë në pozicionin më të fortë, para, gjatë dhe pas çdo armëpushimi”.

Ndërkohë në orët e para të mëngjesit të sotëm, Rusia nisi një sulm ajror në kryeqytetin e Ukrainës, Kiev, sipas kryetarit të bashkisë së qytetit, Vitali Klitschko.

Kujtojmë se Rusia nisi pushtimin e saj në shkallë të plotë të Ukrainës në shkurt të vitit 2022. Aktualisht ajo kontrollon rreth 20% të territorit ukrainas, përfshirë gadishullin jugor të Krimesë, të aneksuar nga Moska në vitin 2014.