Në Ditën e Fëmijëve, drejtori i Zyrës për Qeverisje të Mirë, të Drejtat e Njeriut, Mundësi të Barabarta dhe Kundër Diskriminimit pranë Zyrës së Kryeministrit, Habit Hajredini dhe shefja e UNICEF-it në Kosovë vizituan një familje strehuese për të parë nga afër ndikimin e fuqishëm që një shtëpi e sigurt dhe përkujdesëse mund të ketë për fëmijët pa përkujdesje prindërore.

Vizita theksoi rëndësinë e investimit në strehim familjar për fëmijët e cenueshëm dhe forcimin e shërbimeve të mbrojtjes së fëmijëve për të siguruar që çdo fëmijë në Kosovë të rritet i shëndetshëm, i sigurt dhe i aftë për të arritur potencialin e tij të plotë. Kjo përparësi është e mundur vetëm me udhëheqje të fuqishme dhe përkushtim nga vendimmarrësit dhe partnerët.

Për të avancuar të drejtat e fëmijëve, nën udhëheqjen e Zyrës për Qeverisje të Mirë, takimet e rregullta të Komitetit Ndërministror për të Drejtat e Fëmijëve kanë krijuar një platformë të rëndësishme që u jep fëmijëve zë, u mundëson të ndajnë perspektivat e tyre dhe të angazhohen drejtpërdrejt me vendimmarrësit.

Për më tepër, është thelbësore të prioritizohen të drejtat e fëmijëve dhe të sigurohet një ndarje e mjaftueshme buxhetore, pasi investimi në fëmijë është thelbësor për kapitalin njerëzor të Kosovës, zhvillimin e qëndrueshëm dhe kohezionin social.

Zyra për Qeverisje të Mirë, me mbështetjen teknike të UNICEF-it, është duke zhvilluar Strategjinë për të Drejtat e Fëmijëve, duke u bazuar në dëshmi dhe në zërat e vetë fëmijëve. Për të siguruar që Strategjia për të Drejtat e Fëmijës të sjellë rezultate të vërteta, është thelbësore që ajo të buxhetohet në mënyrë të përshtatshme dhe të adresojë privimet kryesore me të cilat përballen fëmijët.

UNICEF-i në Kosovë vazhdon të luajë një rol të rëndësishëm në gjenerimin e të dhënave dhe dëshmive për të ndihmuar në hartimin e politikave më të mira për fëmijët.

Anketa e Treguesve të Shumëfishtë (MICS) do të sigurojë të dhëna me cilësi të lartë mbi situatën e fëmijëve dhe grave në të gjithë Kosovën. Studimet e mëparshme, si Analizë mbi gjendjen klimatike për fëmijë dhe Studimi mbi Fëmijët në Situata Rruge në Kosovë sigurojnë që zërat dhe nevojat e fëmijëve më të cenueshëm të dëgjohen dhe adresohen.

“Ne u bëjmë thirrje institucioneve që të: Vendosin fëmijët në krye të agjendës përmes investimeve domethënëse në mirëqenien e tyre. Institucionet duhet të rrisin ndarjet e përgjithshme buxhetore për fëmijët, veçanërisht për më të privuarit, për të siguruar qasje në shërbime thelbësore sociale, shëndetësore dhe arsimore. Kjo nuk është vetëm një hap drejt barazisë, por një investim strategjik për të arritur fëmijët e cenueshem dhe për të ndërtuar shoqëri gjithëpërfshirëse. Vendosin zërin e fëmijëve në qendër të vendimmarrjes që formëson të ardhmen e tyre. Fëmijët dhe të rinjtë duhet jo vetëm të dëgjohen, por të fuqizohen për të marrë pjesë aktive në formësimin e një të ardhmeje që pasqyron shpresat, nevojat dhe të drejtat e tyre. Politikat që ndikojnë në jetën e tyre duhet të prioritizojnë perspektivat e tyre dhe t’i trajtojnë ata si partnerë të vërtetë në ndërtimin e një bote më të mirë. Vazhdojnë gjenerimin e dëshmive dhe të dhënave për fëmijët që ndihmojnë në formësimin e jetës dhe kushteve të tyre. Këto të dhëna janë thelbësore për marrjen e vendimeve të bazuara në dëshmi, për përshtatjen e ligjeve dhe politikave me nevojat reale të fëmijëve, si dhe për të zbuluar pabarazitë mes grupeve të ndryshme. Këto njohuri janë thelbësore për të ofruar mbështetje të synuar për më të margjinalizuarit dhe për të siguruar që asnjë fëmijë të mos mbetet pas. UNICEF dhe Zyra për Qeverisje të Mirë do të intensifikojnë përpjekjet për të siguruar që asnjë fëmijë të mos mbetet pas. Çdo fëmijë në Kosovë meriton një mundësi të drejtë për të arritur potencial e tij/saj të plotë”, është thënë në njoftimin për medie.