Një valë e të ftohtit po godet Argjentinën , Kilin dhe Uruguain , duke vrarë të paktën 15 persona dhe duke i detyruar qeveritë të kufizojnë përdorimin e gazit natyror dhe të ngrenë strehimore emergjente.

Një masë ajri polar nga Antarktida po ndikon në rajon, duke ulur temperaturat shumë nën 0° Celsius në këto tre vende të Amerikës Latine . Në Argjentinë, të paktën nëntë persona të pastrehë kanë vdekur për shkak të të ftohtit këtë dimër, sipas organizatës joqeveritare Proyecto 7 .

Në Buenos Aires, temperatura ra në -1.9°C të mërkurën, niveli më i ulët në 34 vjet. Ndërprerjet e energjisë elektrike të shkaktuara nga kërkesa e lartë lanë mijëra njerëz pa energji për më shumë se 24 orë në disa zona. Bora ka mbuluar edhe  plazhet Atlantike të Argjentinës, ndërsa në komunitetin e vogël patagonian të Macinchao , temperatura ra në -18°C të martën.

Qeveria e vendit pezulloi të mërkurën furnizimin me gaz natyror për bizneset dhe stacionet e benzinës për të siguruar që të kishte mjaftueshëm për të përmbushur nevojat e familjeve.

Autoritetet në Uruguai , ku temperaturat ranë nën zero në disa zona, shpallën një “alarm të kuq” mbarëkombëtar pasi gjashtë persona vdiqën. Sipas alarmit të kuq, qeveria mund t’i zhvendosë njerëzit e pastrehë në strehimore të përkohshme.

Në Montevideo , temperatura më e lartë e regjistruar më 30 qershor ishte 5.8 gradë Celsius, niveli më i ulët që nga viti 1967, sipas meteorologut Mario Bidegain.